قيم نفسك

الحياة عمرها ما هتمشي علي هوانا ولا هتتحرك معانا بالريموت كنترول .. لازم هتتعب وتعافر وتفشل 100 مرة قبل ما تنجح مرة ويمكن ده سبب فرحتنا بالنجاح .. انه بييجي بعد محاولات .. مش مهم عددها علي قد ماصبرك وعزيمتك واصرارك أهم …

متخليش الطريق هو اللي يختارك .. اختار انت طريقتك واختار اسلوبك ومتبصش لحد ولا تحاول تقلد حد … ربنا هيحاسبك علي فعلك أنت مش رد فعل الناس معاك ..

عود نفسك علي حاجتين لما حد يظلمك او يضايقك .. ياتقول ربنا يهديه .. ياتقول حسبنا الله ونعم الوكيل .. متدعيش عليه وتفضل تهري ف نفسك .. اي مشكلة بتمر عليك هي درس تتعلم منه مش شوكة هتخش ف لحمك وتبقي دمل .. بايدك تلحقها وبايدك تسيب الجرح الصغير يكبر لحد ما يتمكن منك …

لو مستني حاجة معينه تحصل في حياتك الاول علشان تغير باقي الحاجات والموضوع طول .. الحق بسرعه وغير ترتيب اولوياتك .. غير ترتيب افكارك .. انت لو داخل امتحان اول سؤال فيه صعب هتسيبه وتخش علي اللي بعده .. خلي حياتك كمان كدا …

اختار اسلوبك انت وطريقتك انت واللي هيحبك هيحبك علي وضعك وهيكبرك ويدفعك للنجاح … مديش لأي حد اكتر من فرصتين والتالته قوله خلاص …

محدش هيساعدك غير انت … نفسك .. غير كدا مفيش غير اتنين هما ابوك وامك ..

الرضا بيكون من القلب .. ومش هيحصل غير لما تعرف قيمه نفسك وتدوس علي الوهم بقلب جامد وانت مضطمن اوي ان مفيش حاجة هتصيبك غير بأمر الله وحده .. !!

متبقاش عامل زي اللي راكب عربيه مركز اوي قدامه .. بيشوف نقطه واحده وهيعمل حادثه لو اي حاجه طلعتله فجأة .. انما لو بيتلفت حواليه زاوية الرؤيه عنده بتكبر وبيشوف الطريق كامل …

خوفك اللي بيموتك …..

رزقك مكتوبلك وهتاخده حتي لو حاولت تهرب منه …

قوتك في قوة ايمانك بترتيبات الخالق ليك …